ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបន្តបកស្រាយសារជាថ្មីចំពោះអវត្តមានរបស់សម្ដេចកត្តិព្រឹទ្ធបណ្ឌិតក្នុងជំនួបជាមួយនឹងភរិយាមេដឹកនាំពិភពលោកដែលមកចូលរួមក្នុងកិច្ចប្រជុំកំពូលអាស៊ាននៅក្នុងខែវិច្ឆិកានេះ។ ជាមួយគ្នានោះសម្ដេចក៏បានផ្ដាំទៅដោយមិនចំឈ្មោះដោយសម្ដេចថាគឺជាក្មេងពាលម្នាក់ដែលតែងតែប្រើវោហាសាស្ត្របោកប្រាស់។
សម្តេចតេជោ ហ៊ុន សែន បានផុសនៅលើ ហ្វេសបុកផេក របស់សម្ដេចនៅព្រឹកថ្ងៃទី៩ ខែវិច្ឆិកា ឆ្នាំ២០២២ នេះថា៖ «តាំងពីចូលរួមអាស៊ាន១៩៩៩ មកភរិយាខ្ញុំមិនដែលខកខានក្នុងការចូលរួមប្រជុំអាស៊ានប្រចាំឆ្នាំជាមួយខ្ញុំឡើយ។ ពេលធ្វើប្រធានអាស៊ានឆ្នាំ២០០២ និងឆ្នាំ២០១២ ភរិយាខ្ញុំបានបំពេញកិច្ចការដ៍ល្អក្នុងនាមភរិយាប្រធានអាស៊ាន។ មិនត្រឹមតែអាស៊ានទេដែលភរិយាខ្ញុំចូលរួមអមដំណើរខ្ញុំគឺគ្រប់វេទិការអន្តរជាតិតែម្តងដែលភរិយានៅជាមួយខ្ញុំរហូតមានអង្គការសហប្រជាជាតិ ចលនាមិនចូលបក្សសម្ព័ន្ធ ត្បូង ត្បូង អាសុី អឺរ៉ុប។ល។»
សម្ដេចតេជោបន្ថែមថា៖ «សូម្បីតែការចរចារកសន្តិភាពរវាងភាគីកម្ពុជាក៍មានវត្តមានភរិយាទៅចូលរួមជាប់ជានិច្ចដែលគេអាចមើលឃើញក្នុងខ្សែភាពយន្តគេនិងឃើញភរិយាខ្ញុំឈរពីក្រោយខ្ញុំពេលចុះហត្ថលេខាលើកិច្ចព្រមព្រៀងប៉ារីសតាំងពីក្មេងពាលនៅស្រាតនៅឡើយ។ នៅមានទៀតភរិយាខ្ញុំនៅបានធ្វើសកម្មភាពដោយឡែផ្សេងទៀតនៅតាមទីកន្លែងនិងប្រធានបទខុសៗគ្នារាប់ទាំងទៅថ្លែងការនៅអង្គការសហប្រជាជាតិតាមការអញ្ជើញពីអគ្គលេខាធិការអង្គការសហប្រជាជាតិទៀតផង»។
សម្ដេចផ្តាំទៅថា៖ «ក្មេងពាលពីកំណើតឈប់បាន ឈប់ទៅរឿងបោកប្រាស់»។
កាលពីកន្លងទៅនាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានសុំទោសទៅកាន់មេដឹកនាំពិភពលោកចំពោះអវត្តមានរបស់ សម្ដេចកត្តិព្រឹទ្ធបណ្ឌិតនៅក្នុងការប្រជុំនានាកន្លងមក និងកិច្ចប្រជុំកំពូលអាស៊ាននៅពេលខាងមុខគឺដោយសារតែសម្ដេចកិត្តិព្រឹទ្ធបណ្ឌិតមានបញ្ហាសុខភាពទាក់ទងទៅនឹងឆ្អឹងខ្នង ដែលមិនអាចឱ្យសម្ដេចកត្តិព្រឹទ្ធបណ្ឌិតអង្គុយបានយូរបាន៕
